Golfkennsla í kvöld

Ég fer í golfkennslu í kvöld og næ vonandi að laga sveifluna enn meira. Eftir síðasta tíma náði ég að laga nokkur atriði, stöðuna á höfðinu sem var þannig að ég horfði of mikið niður, núna er hausinn upp en augun niður. Svo var það hvernig ég hreyfði fótinn, sem ég gerði aðeins, en geri ekki núna. Og svo er ég að vinna í að laga tempóið í sveiflunni. Ég fór of hratt niður og var að reyna of mikið að slá fast, en núna reyni ég að fara rólega af stað og svo eyk ég hraðann þegar neðar dregur. Þegar ég næ þessu öllu í einu, næ ég frábærum höggum. Þetta er allavega að svínvirka. Freyja er að fara að laga einhver atriði, þó ekki þau sömu og ég, því ég er kominn lengra en hún í sveiflunni :) Hún er öll að koma til, en þarf að laga nokkur atriði. Er allavega efnileg. Og það er gaman að keppa við hana á jafnréttisgrundvelli á litla vellinum í Setberginu. Ég stend betur að vígi á lengri völlum hinsvegar, en það lagast þegar tíminn líður og hún æfist. Hér er staðurinn sem við æfum á undir leiðsögn kennara. Sú sem kennir okkur er Ragnhildur Sigurðardóttir og er margfaldur íslandsmeistari kvenna í golfi.